نظام الي علي راسه بطحه ده مش نافع يا ثوره يا مش ثوره انما اصل مش عارفين نحبسه علشان هايقول علي فضايح ماعرفش مين ومافيش حبس ولا فيش فلوس وشويه ونلاقيه مات وتطلع اشاعات تقول انه اتقتل ويبقي ملك فاروق جديد وتضيع الحقيقه كالعاده وبرضه شالو الضو حطو شاهين ييجي رئيس جمهوريه جديد وحواليه شويه منتفعين بس المره دي هايكونوا بدقون او من غير الله اعلم وشويه ونلاقي نفسنا من غير سينا ومن غير مطروح ومن غير اسوان وهاتبقي فته ويغمه ونحارب علشان نلم البلد تاني كل ده علشان من دلوقتي فيه حد بي*** وبيلف علي مطالب الثوره لمصالحه الشخصيه وعلشان مايتفضحش هو وشلة المنتفعين الخفيه واصحاب بدل الولاء ومش عاوز اتكلم اكتر من كده هما عارفين نفسهم والشعب كمان عارفهم ويظهر ان انهم مستنيين لما الثوره تيجي من جواهم والعمود الي كلنا بنقول مسنودين عليه يتفتفت وينهار ويارب ماكونش عايش لما اليوم ده ييجي
انا بجد عاوز الجيش يطلع يقول بصراحه ايه الي بيحصل
يقول ياجماعه فيه اتفاق اتعمل مع الناس دي علشان يسيبوا الحكم من غير دم وخلاص انسوا بقي مافيش حاجه هاتحصل اكتر من كده وهانسكت ونرضي
او يطلعوا يقولولنا ايه الي معطل المحاكمات والميوعه الي في كل حاجه في البلد دي ليه من اول الشرطه والاقتصاد والسياحه والبلطجه والفلول والفتنه معلش بقي كل الحاجات دي مترتبه ومتظبطه وكم الافكار والاقتراحات الي بتترمي في الزباله من متخذي القرار غير عادي ولما يقولولنا ياما يقنعونا ياما يضربونا بالنار في التحرير (لاننا نازلين نازلين بالمنظر ده وانتوا الي بتدفعونا لكده ) ياما نقنعكوا انتو بالي احنا شايفينه والي انتوا بتغمضوا عينيكو علشان ماتشوفوهوش
انا لما كنت باشوف اللواءات الي كانوا بيطلعوا مع مني الشاذلي او في اون تي في كنت بابقي فرحان جدا ان الجيش فيه عقول زي دي توزن بدل البلد مية بلد لكن اسمع كلامك اصدقك اشوف امورك استعجب
ان كان حبيبك عسل ماتلحسوش كله يعني الشعب طيب ومهاود وصبور بس بيجيله وقت وينفجر وانتوا عمالين - بسم الله ما شاء الله - لاتألوا جهدفي الضغط علي اعصاب الشعب لما قرب يطرشق طبعا كلامي لن يعجب اعضاء حزب ربات البيوت واحزاب كل واشكر واكل العيش يحب الخفيه والي ييجي منهم احسن منهم الحل في المصارحه صارحونا ويانقبل كلامكم ياما نعفيكم من المسئوليه ونشوف حد تاني يشيل يا عصام بك الناس عندها ثقه فيك ماتضيعش الثقه دي مش هاتلاقيها تاني اللهم بلغت اللهم فاشهد
